ಮಂಗಳೂರು: ಕರಾವಳಿಯ ಜಾನಪದ ಕ್ರೀಡಾಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದ 2026-27ರ ಸಾಲಿನ ಅಧಿಕೃತ ಕಂಬಳ ವೇಳಾಪಟ್ಟಿಯನ್ನು ಜಿಲ್ಲಾ ಕಂಬಳ ಸಮಿತಿಯು ಪ್ರಕಟಿಸಿದೆ. ಈ ಬಾರಿಯ ಕಂಬಳ ಸೀಸನ್ ಒಟ್ಟು 28 ರೋಮಾಂಚನಕಾರಿ ಕೂಟಗಳನ್ನು ಒಳಗೊಂಡಿದ್ದು, ಇದೇ ಮೊದಲ ಬಾರಿಗೆ ಕರ್ನಾಟಕದ ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಅದ್ಧೂರಿ ಚಾಲನೆ ಸಿಗಲಿದೆ.
ಅಕ್ಟೋಬರ್ 18 ರಿಂದ ಆರಂಭ:ಈ ಬಾರಿಯ ಸೀಸನ್ ಅಕ್ಟೋಬರ್ 18 ಮತ್ತು 19 ರಂದು ನಡೆಯಲಿರುವ ‘ಮೈಸೂರು ದಸರಾ ಕಂಬಳ’ದೊಂದಿಗೆ ಅಧಿಕೃತವಾಗಿ ಆರಂಭವಾಗಲಿದೆ. ಕರಾವಳಿಯ ಗಂಡುಕಲೆ ಕಂಬಳವನ್ನು ರಾಜಧಾನಿ ಬೆಂಗಳೂರಿನ ಬಳಿಕ ಈಗ ಮೈಸೂರು ದಸರಾ ಮಹೋತ್ಸವದ ಸಂದರ್ಭದಲ್ಲಿ ಪ್ರದರ್ಶಿಸಲು ಭರ್ಜರಿ ಸಿದ್ಧತೆಗಳು ನಡೆದಿವೆ.
ಪ್ರಮುಖ ಕಂಬಳ ಕೂಟಗಳ ದಿನಾಂಕಗಳು:
ನವೆಂಬರ್ 14, 2026: ಸಾನೂರು ಕಂಬಳ
ನವೆಂಬರ್ 21, 2026: ಕೊಡಂಗೆ ಕಂಬಳ
ಡಿಸೆಂಬರ್ 19, 2026: ಮಂಗಳೂರು ಕಂಬಳ
ಜನವರಿ 23, 2027: ಮೂಡುಬಿದಿರೆ ಕಂಬಳ
ಜನವರಿ 30, 2027: ಐಕಳ ಕಂಬಳ
ಫೆಬ್ರವರಿ 6, 2027: ಪುತ್ತೂರು ಕಂಬಳ
ಮೇ 1, 2027: ಕಡಂದಲೆ ಪರಾರಿ ಕಂಬಳ
ಸುಮಾರು 7 ತಿಂಗಳುಗಳ ಕಾಲ ನಡೆಯಲಿರುವ ಈ ಜೋಡುಕರೆ ಕಂಬಳ ಉತ್ಸವವು ಮೇ 1, 2027 ರಂದು ಕಡಂದಲೆ ಪರಾರಿ ಕಂಬಳದೊಂದಿಗೆ ಮುಕ್ತಾಯಗೊಳ್ಳಲಿದೆ.
ಕರಾವಳಿಯ ಕೋಣಗಳ ವೇಗ ಹಾಗೂ ಯಜಮಾನರ ಪ್ರತಿಷ್ಠೆಯ ಈ ಕ್ರೀಡಾ ಹಬ್ಬವನ್ನು ಕಣ್ಣುಂಬಿಕೊಳ್ಳಲು ಲಕ್ಷಾಂತರ ಅಭಿಮಾನಿಗಳು ಸಜ್ಜಾಗುತ್ತಿದ್ದಾರೆ. ಸಂಪೂರ್ಣ ವೇಳಾಪಟ್ಟಿ ಮತ್ತು ಲೈವ್ ಅಪ್ಡೇಟ್‌ಗಳಿಗಾಗಿ ವಾಯ್ಸ್ ಆಫ್ ತುಳುನಾಡು ಜಾಲತಾಣವನ್ನು ವೀಕ್ಷಿಸಬಹುದಾಗಿದೆ.
