ಕೃಪೆ : ಪಿಂಗಾರ
ಅಯೋಧ್ಯೆ: ಉತ್ತರ ಪ್ರದೇಶದ ಅಯೋಧ್ಯೆಯಲ್ಲಿರುವ ಪವಿತ್ರ ಶ್ರೀರಾಮ ಜನ್ಮಭೂಮಿ ರಾಮಮಂದಿರದ ದರ್ಶನ ಮತ್ತು ಆರತಿ ವೇಳಾಪಟ್ಟಿಯನ್ನು ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್ ಪರಿಷ್ಕರಿಸಿದೆ. ಬಾಲಕ ರಾಮನ ವಿಶ್ರಾಂತಿ ಸಮಯ ಹಾಗೂ ನಿಗದಿತ ಪೂಜಾ ವಿಧಿವಿಧಾನಗಳನ್ನು ಗಮನದಲ್ಲಿಟ್ಟುಕೊಂಡು, 2026ರ ನವೆಂಬರ್ 1ರಿಂದ ಹೊಸ ವೇಳಾಪಟ್ಟಿ ಜಾರಿಗೆ ಬರಲಿದೆ.
ದೇವಸ್ಥಾನದ ತೆರೆಯುವ ಮತ್ತು ಮುಚ್ಚುವ ಸಮಯದಲ್ಲಿ ಬದಲಾವಣೆಹೊಸ ಮಾರ್ಗಸೂಚಿಯ ಪ್ರಕಾರ, ಪ್ರಸ್ತುತ ಮುಂಜಾನೆ 3:45ಕ್ಕೆ ತೆರೆಯಲಾಗುವ ದೇವಸ್ಥಾನದ ಬಾಗಿಲುಗಳು ಇನ್ನು ಮುಂದೆ ಮುಂಜಾನೆ 4 ಗಂಟೆಗೆ ತೆರೆಯಲಿವೆ. ಅದೇ ರೀತಿ, ರಾತ್ರಿ 10:30ಕ್ಕೆ ಮುಚ್ಚಲಾಗುತ್ತಿದ್ದ ದೇವಸ್ಥಾನವು ಇನ್ನು ಮುಂದೆ ರಾತ್ರಿ 10 ಗಂಟೆಗೆ ಮುಚ್ಚಲಿದೆ.
ಇದರಿಂದ ಭಕ್ತರಿಗೆ ದರ್ಶನ ಪಡೆಯಲು ಲಭ್ಯವಿರುವ ಸಮಯವು ದಿನಕ್ಕೆ 14.5 ಗಂಟೆಗಳಿಂದ 13 ಗಂಟೆಗಳಿಗೆ ಇಳಿಕೆಯಾಗಲಿದೆ.ನವೆಂಬರ್ 1ರಿಂದ ಜಾರಿಗೆ ಬರಲಿರುವ ಸಂಪೂರ್ಣ ಹೊಸ ವೇಳಾಪಟ್ಟಿ ಹೀಗಿದೆ.
ಮುಂಜಾನೆಯ ವೇಳಾಪಟ್ಟಿ : ಮುಂಜಾನೆ 4:00: ದೇವಸ್ಥಾನದ ಬಾಗಿಲು ತೆರೆಯಲಾಗುತ್ತದೆ. ಮುಂಜಾನೆ 4:30ರಿಂದ 4:40ರವರೆಗೆ: ಮಂಗಳ ಆರತಿ ನಡೆಯಲಿದೆ.
ಮುಂಜಾನೆ 4:40ರಿಂದ 6:30ರವರೆಗೆ: ಸಾರ್ವಜನಿಕರಿಗೆ ದರ್ಶನಕ್ಕೆ ಪ್ರವೇಶ ಇರುವುದಿಲ್ಲ. ಈ ಅವಧಿಯಲ್ಲಿ ಅರ್ಚಕರು ರಾಮಲಲ್ಲಾನಿಗೆ ಅಭಿಷೇಕ, ಶೃಂಗಾರ, ಧೂಪ-ದೀಪ ಸೇರಿದಂತೆ ವಿವಿಧ ಪೂಜಾ ವಿಧಿವಿಧಾನಗಳನ್ನು ನೆರವೇರಿಸಲಿದ್ದಾರೆ.
ಮುಂಜಾನೆ 6:30: ಶೃಂಗಾರ ಆರತಿ ನಡೆಯಲಿದೆ. ಮುಂಜಾನೆ 7:00: ಭಕ್ತರಿಗೆ ಅಧಿಕೃತವಾಗಿ ದರ್ಶನ ಆರಂಭವಾಗಲಿದೆ. ಬೆಳಗ್ಗೆ 8:00ರಿಂದ 8:10ರವರೆಗೆ: ಬಾಲಭೋಗ ನೈವೇದ್ಯ ಸಮರ್ಪಣೆಗಾಗಿ ದೇವಸ್ಥಾನದ ಬಾಗಿಲುಗಳನ್ನು 10 ನಿಮಿಷಗಳ ಕಾಲ ಮುಚ್ಚಲಾಗುತ್ತದೆ. ಬಳಿಕ ಮತ್ತೆ ದರ್ಶನ ಆರಂಭವಾಗಿ ಬೆಳಗ್ಗೆ 11:30ರವರೆಗೆ ಮುಂದುವರಿಯಲಿದೆ.
ಮಧ್ಯಾಹ್ನದ ವೇಳಾಪಟ್ಟಿ : ಬೆಳಗ್ಗೆ 11:30ರಿಂದ ಮಧ್ಯಾಹ್ನ 12:00ರವರೆಗೆ: ರಾಜಭೋಗ ಸಮರ್ಪಣೆ ನಡೆಯಲಿದ್ದು, ಈ ಸಮಯದಲ್ಲಿ ಭಕ್ತರಿಗೆ ದರ್ಶನ ಲಭ್ಯವಿರುವುದಿಲ್ಲ.
ಮಧ್ಯಾಹ್ನ 12:00: ರಾಜಭೋಗ ಆರತಿ ನಡೆಯಲಿದೆ. ಮಧ್ಯಾಹ್ನ 12:30ರಿಂದ 1:30ರವರೆಗೆ: ಬಾಲಕ ರಾಮನ ಮಧ್ಯಾಹ್ನದ ವಿಶ್ರಾಂತಿಯ ಸಮಯವಾಗಿರುತ್ತದೆ. ಈ ಒಂದು ಗಂಟೆಯ ಅವಧಿಯಲ್ಲಿ ಗರ್ಭಗುಡಿಯ ಬಾಗಿಲುಗಳನ್ನು ಸಂಪೂರ್ಣವಾಗಿ ಮುಚ್ಚಲಾಗುತ್ತದೆ. ಮಧ್ಯಾಹ್ನ 1:35: ಭಕ್ತರಿಗೆ ಮತ್ತೆ ದರ್ಶನ ಆರಂಭವಾಗಲಿದೆ.
ಸಂಜೆ ಮತ್ತು ರಾತ್ರಿ ವೇಳಾಪಟ್ಟಿ : ಸಂಜೆ 4:00ರಿಂದ 4:10ರವರೆಗೆ: ಸಂಜೆ ಬಾಲಭೋಗ ನೈವೇದ್ಯ ಸಮರ್ಪಣೆಗಾಗಿ ದೇವಸ್ಥಾನದ ಬಾಗಿಲುಗಳನ್ನು ಮುಚ್ಚಲಾಗುತ್ತದೆ. ಬಳಿಕ ಸಂಜೆ 6:45ರವರೆಗೆ ದರ್ಶನಕ್ಕೆ ಅವಕಾಶವಿರುತ್ತದೆ.
ಸಂಜೆ 6:45ರಿಂದ 7:00ರವರೆಗೆ: ಧೂಪ-ದೀಪ ಹಾಗೂ ನೈವೇದ್ಯ ಸಮರ್ಪಣೆ ನಡೆಯಲಿದೆ. ಸಂಜೆ 7:00: ಸಂಧ್ಯಾ ಆರತಿ ನೆರವೇರಲಿದೆ. ರಾತ್ರಿ 8:00ರಿಂದ 8:30ರವರೆಗೆ: ಧೂಪ-ದೀಪ ಹಾಗೂ ವಿಶೇಷ ನೈವೇದ್ಯ ಸಮರ್ಪಣೆಗಾಗಿ ದೇವಸ್ಥಾನದ ಬಾಗಿಲುಗಳನ್ನು ಮುಚ್ಚಲಾಗುತ್ತದೆ.
ರಾತ್ರಿ 9:15ರಿಂದ 9:30ರವರೆಗೆ : ಧೂಪ-ದೀಪ ಮತ್ತು ವಿಶೇಷ ನೈವೇದ್ಯ ಸಮರ್ಪಣೆಗಾಗಿ ಮತ್ತೆ ಬಾಗಿಲುಗಳನ್ನು ಮುಚ್ಚಲಾಗುತ್ತದೆ. ರಾತ್ರಿ 9:30: ಶಯನ ಆರತಿ ನಡೆಯಲಿದೆ. ಇದು ದೇವರಿಗೆ ರಾತ್ರಿ ವಿಶ್ರಾಂತಿ ಕಲ್ಪಿಸುವ ಮೊದಲು ನೆರವೇರಿಸುವ ಅಂತಿಮ ಆರತಿಯಾಗಿದೆ. ರಾತ್ರಿ 10:00: ದೇವಸ್ಥಾನದ ಬಾಗಿಲುಗಳನ್ನು ಸಂಪೂರ್ಣವಾಗಿ ಮುಚ್ಚಲಾಗುತ್ತದೆ.
ನವೆಂಬರ್ 1ರಿಂದ ಹೊಸ ಸಮಯ ಜಾರಿಯಾಗಲಿರುವ ಹಿನ್ನೆಲೆಯಲ್ಲಿ, ಅಯೋಧ್ಯೆಯ ರಾಮಮಂದಿರಕ್ಕೆ ಭೇಟಿ ನೀಡುವ ಭಕ್ತರು ತಮ್ಮ ದರ್ಶನದ ಸಮಯವನ್ನು ಹೊಸ ವೇಳಾಪಟ್ಟಿಗೆ ಅನುಗುಣವಾಗಿ ಯೋಜಿಸಿಕೊಳ್ಳುವಂತೆ ಸೂಚಿಸಲಾಗಿದೆ.
