ಲೇಖನ: ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ
ಇಂದಿನ ಡಿಜಿಟಲ್ ಯುಗದಲ್ಲಿ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ಬೆಳೆದಂತೆ, ‘ಡಿಪ್ಫೇಕ್’ (Deepfake) ತಂತ್ರಜ್ಞಾನದ ದುರುಪಯೋಗವೂ ಹೆಚ್ಚುತ್ತಿದೆ. ಯಾರಾದರೂ ನಿಮ್ಮ ಒಪ್ಪಿಗೆಯಿಲ್ಲದೆ ನಿಮ್ಮ ನಕಲಿ (ಡಿಪ್ಫೇಕ್) ಚಿತ್ರ ಅಥವಾ ವೀಡಿಯೊಗಳನ್ನು ಅಂತರ್ಜಾಲದಲ್ಲಿ ಹಂಚಿಕೊಂಡರೆ ಅಥವಾ ದುರುಪಯೋಗಪಡಿಸಿಕೊಂಡರೆ, ಅದನ್ನು ತಕ್ಷಣವೇ ಇಂಟರ್ನೆಟ್ನಿಂದ ತೆಗೆದುಹಾಕಲು ಒಂದು ಪ್ರಮುಖ ಮತ್ತು ಉಚಿತ ವೇದಿಕೆ ಲಭ್ಯವಿದೆ.
STOPNCII.ORG ಎಂದರೇನು?StopNCII.org (Stop Non-Consensual Intimate Image Abuse) ಎಂಬುದು ಸೈಬರ್ ಸುರಕ್ಷತಾ ಸಂಸ್ಥೆಗಳು ಮತ್ತು ಪ್ರಮುಖ ಸೋಶಿಯಲ್ ಮೀಡಿಯಾ ಕಂಪನಿಗಳ ಸಹಯೋಗದೊಂದಿಗೆ ನಿರ್ಮಿಸಲಾದ ಜಾಗತಿಕ ಪೋರ್ಟಲ್ ಆಗಿದೆ. ಇದು ಸಮ್ಮತಿಯಿಲ್ಲದೆ ಹಂಚಿಕೊಳ್ಳಲಾದ ಅಥವಾ ಡಿಪ್ಫೇಕ್ ಮಾಡಲಾದ ಖಾಸಗಿ ಚಿತ್ರ/ವೀಡಿಯೊಗಳನ್ನು ಇಂಟರ್ನೆಟ್ನಿಂದ ತೆಗೆದುಹಾಕಲು ಸಹಾಯ ಮಾಡುತ್ತದೆ.ಇದು ಹೇಗೆ ಕೆಲಸ ಮಾಡುತ್ತದೆ?
ಪೋರ್ಟಲ್ ಗೆ ಭೇಟಿ ನೀಡಿ : ಮೊದಲು StopNCII.org ವೆಬ್ಸೈಟ್ಗೆ ಭೇಟಿ ನೀಡಿ ಮತ್ತು “Create Your Case” ಆಯ್ಕೆಯನ್ನು ಆಯ್ದುಕೊಳ್ಳಿ.
ಖಾಸಗಿತನದ ರಕ್ಷಣೆ (Digital Fingerprint) : ಈ ವೆಬ್ಸೈಟ್ ನಿಮ್ಮ ಮೂಲ ಚಿತ್ರ ಅಥವಾ ವೀಡಿಯೊವನ್ನು ತನ್ನ ಸರ್ವರ್ನಲ್ಲಿ ಸಂಗ್ರಹಿಸಿಟ್ಟುಕೊಳ್ಳುವುದಿಲ್ಲ ಅಥವಾ ಬೇರೆಯವರೊಂದಿಗೆ ಹಂಚಿಕೊಳ್ಳುವುದಿಲ್ಲ. ಬದಲಿಗೆ, ನಿಮ್ಮ ಫೈಲ್ನಿಂದ ಒಂದು ‘ಯುನಿಕ್ ಹ್ಯಾಶ್ ಮೌಲ್ಯ’ (Unique Hash Value – ಡಿಜಿಟಲ್ ಫಿಂಗರ್ಪ್ರಿಂಟ್) ಅನ್ನು ಮಾತ್ರ ಸೃಷ್ಟಿಸುತ್ತದೆ.
ಸೋಶಿಯಲ್ ಮೀಡಿಯಾದಿಂದ ತೆರವು : ಈ ಹ್ಯಾಶ್ ಕೋಡ್ ಅನ್ನು ಫೇಸ್ಬುಕ್, ಇನ್ಸ್ಟಾಗ್ರಾಮ್, ರೆಡ್ಡಿಟ್, ಟಿಕ್ಟಾಕ್ನಂತಹ ಪ್ರಮುಖ ಸೋಶಿಯಲ್ ಮೀಡಿಯಾ ವೇದಿಕೆಗಳೊಂದಿಗೆ ಹಂಚಿಕೊಳ್ಳಲಾಗುತ್ತದೆ. ಆ ವೇದಿಕೆಗಳು ತಮ್ಮ ಸಿಸ್ಟಮ್ನಲ್ಲಿ ಈ ಹ್ಯಾಶ್ ಕೋಡ್ಗೆ ಹೋಲುವ ಯಾವುದೇ ಚಿತ್ರ ಅಥವಾ ವೀಡಿಯೊ ಕಂಡುಬಂದರೂ ಅದನ್ನು ತಕ್ಷಣವೇ ಡಿಲೀಟ್ ಮಾಡುತ್ತವೆ.
ಮುಖ್ಯ ಮಾಹಿತಿಗಳು : ಈ ಪೋರ್ಟಲ್ ಸುಮಾರು 34ಕ್ಕೂ ಹೆಚ್ಚು ಭಾಷೆಗಳಲ್ಲಿ ಲಭ್ಯವಿದೆ.ಇದುವರೆಗೆ 3 ಲಕ್ಷಕ್ಕೂ ಹೆಚ್ಚು ದುರುಪಯೋಗಗೊಂಡ ವೀಡಿಯೊ ಮತ್ತು ಚಿತ್ರಗಳನ್ನು ಇಂಟರ್ನೆಟ್ನಿಂದ ಯಶಸ್ವಿಯಾಗಿ ತೆಗೆದುಹಾಕಿದೆ.ಸೈಬರ್ ಅಪರಾಧಗಳಿಂದ ಸುರಕ್ಷಿತವಾಗಿರಲು ಮತ್ತು ನಿಮ್ಮ ಡಿಜಿಟಲ್ ಹಕ್ಕುಗಳನ್ನು ಕಾಯ್ದುಕೊಳ್ಳಲು ಈ ಮಾಹಿತಿಯನ್ನು ತಿಳಿದುಕೊಳ್ಳುವುದು ಮತ್ತು ಇತರರೊಂದಿಗೆ ಹಂಚಿಕೊಳ್ಳುವುದು ಅತ್ಯಗತ್ಯ.
