ಮಂಗಳೂರು: ಮಂಗಳೂರು ನಗರದ ವಸತಿ ಕ್ಷೇತ್ರಕ್ಕೆ ಮತ್ತೊಂದು ಆಕರ್ಷಕ ಯೋಜನೆ ಸೇರ್ಪಡೆಯಾಗುತ್ತಿದೆ. ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರ (ಮುಡಾ) ಕುಂಜತ್ತಬೈಲ್‌ನಲ್ಲಿ ಅಭಿವೃದ್ಧಿಪಡಿಸಿರುವ ಅತ್ಯಾಧುನಿಕ ವಸತಿ ಬಡಾವಣೆಯ ನಿವೇಶನಗಳ ಮಾರಾಟ ಪ್ರಕ್ರಿಯೆಯನ್ನು ಚುರುಕುಗೊಳಿಸಿದೆ.
ಸುಸಜ್ಜಿತ ಮೂಲಸೌಕರ್ಯ ಹಾಗೂ ಆಧುನಿಕ ನಾಗರಿಕ ಸೌಲಭ್ಯಗಳೊಂದಿಗೆ ರೂಪಿಸಲಾಗಿರುವ ಈ ಬಡಾವಣೆ ಮನೆ ನಿರ್ಮಾಣದ ಕನಸು ಹೊಂದಿರುವವರಿಗೆ ಉತ್ತಮ ಅವಕಾಶವಾಗುವ ನಿರೀಕ್ಷೆಯಿದೆ.
ಕುಂಜತ್ತಬೈಲ್‌ನ 17.49 ಎಕರೆ ಪ್ರದೇಶದಲ್ಲಿ ಸುಮಾರು 8.75 ಕೋಟಿ ರೂ. ವೆಚ್ಚದಲ್ಲಿ ಈ ಬಡಾವಣೆಯನ್ನು ಅಭಿವೃದ್ಧಿಪಡಿಸಲಾಗಿದೆ. ಒಟ್ಟು 208 ನಿವೇಶನಗಳನ್ನು ಹೊಂದಿರುವ ಯೋಜನೆಯಲ್ಲಿ ಈಗಾಗಲೇ 32 ನಿವೇಶನಗಳನ್ನು ಹಂಚಿಕೆ ಮಾಡಲಾಗಿದ್ದು, ಉಳಿದ ನಿವೇಶನಗಳ ಹಂಚಿಕೆಗೆ ಮುಡಾ ಅರ್ಜಿ ಆಹ್ವಾನಿಸಿದೆ.
ಆಸಕ್ತರು ನಿವೇಶನದ ಒಟ್ಟು ಮೊತ್ತದ ಶೇ.10ರಷ್ಟು ಹಣವನ್ನು ಪಾವತಿಸಿ ಡಿಸೆಂಬರ್ 28ರೊಳಗೆ ಅರ್ಜಿ ಸಲ್ಲಿಸಬಹುದಾಗಿದೆ.ಯೋಜಿತ ಬಡಾವಣೆಗೆ ಆಧುನಿಕ ಸ್ಪರ್ಶಉತ್ತಮ ಭವಿಷ್ಯಕ್ಕಾಗಿ ಯೋಜಿತ ಸಮುದಾಯ ನಿರ್ಮಿಸುವ ಉದ್ದೇಶದಿಂದ ಬಡಾವಣೆಯ ವಿನ್ಯಾಸ ರೂಪಿಸಲಾಗಿದೆ.
ವಿವಿಧ ಅಳತೆಗಳ 12/20, 12/24, 9/20, 9/16 ಹಾಗೂ 6/12 ಮಾದರಿಯ ನಿವೇಶನಗಳು ಇಲ್ಲಿ ಲಭ್ಯವಿವೆ. ವಿಶಾಲ ರಸ್ತೆಗಳು, ಹಸಿರು ಪ್ರದೇಶಗಳು, ಉದ್ಯಾನವನಗಳು, ತೆರೆದ ಸ್ಥಳಗಳು ಹಾಗೂ ವಾಣಿಜ್ಯ ವಲಯಗಳಿಗೆ ಪ್ರತ್ಯೇಕ ಅವಕಾಶ ಕಲ್ಪಿಸಲಾಗಿದೆ.24 ಗಂಟೆಯ ಭದ್ರತೆ, ಆಕರ್ಷಕ ಪ್ರವೇಶ ದ್ವಾರಬಡಾವಣೆಯ ಪ್ರವೇಶದಲ್ಲಿ ಕಾರ್ಪೊರೇಟ್ ಮಾದರಿಯ ಆಕರ್ಷಕ ಮುಖ್ಯ ದ್ವಾರ ನಿರ್ಮಿಸುವ ಯೋಜನೆ ಇದೆ.
ನಿವಾಸಿಗಳ ಸುರಕ್ಷತೆಗಾಗಿ 24 ಗಂಟೆಯ ಭದ್ರತಾ ವ್ಯವಸ್ಥೆ, ನಿಯಂತ್ರಿತ ಪ್ರವೇಶ, ಸೋಲಾರ್ ಎಲ್‌ಇಡಿ ಬೀದಿ ದೀಪಗಳು, ಹಸಿರು ಗಿಡಗಳು ಹಾಗೂ ವಿಶಾಲ ಸಂಪರ್ಕ ರಸ್ತೆಗಳ ವ್ಯವಸ್ಥೆ ಕಲ್ಪಿಸಲಾಗುತ್ತಿದೆ.ನಿವಾಸಿಗಳ ಅಗತ್ಯಗಳಿಗೆ ವಾಣಿಜ್ಯ ಸೌಲಭ್ಯನಿವಾಸಿಗಳಿಗೆ ದೈನಂದಿನ ಅಗತ್ಯ ವಸ್ತುಗಳು ಹಾಗೂ ಸೇವೆಗಳು ಬಡಾವಣೆಯಲ್ಲಿಯೇ ಲಭ್ಯವಾಗುವಂತೆ ರಿಟೇಲ್ ಮಳಿಗೆಗಳು, ಕೆಫೆ, ರೆಸ್ಟೋರೆಂಟ್, ದಿನಸಿ ಅಂಗಡಿಗಳು ಮತ್ತು ವ್ಯಾಪಾರ ಕೇಂದ್ರಗಳಿಗೆ ಅವಕಾಶ ನೀಡಲಾಗಿದೆ.
ಕೆರೆ ಸೇರಿದಂತೆ ವಿವಿಧ ನಾಗರಿಕ ಸೌಲಭ್ಯಗಳನ್ನು ಅಭಿವೃದ್ಧಿಪಡಿಸುವ ಉದ್ದೇಶವೂ ಇದೆ.ಮಕ್ಕಳು, ಯುವಕರು ಮತ್ತು ಹಿರಿಯರಿಗೂ ವಿಶೇಷ ವ್ಯವಸ್ಥೆಬಡಾವಣೆಯನ್ನು ಕೇವಲ ವಸತಿ ಪ್ರದೇಶವಾಗಿ ಸೀಮಿತಗೊಳಿಸದೆ, ಎಲ್ಲ ವಯೋಮಾನದವರಿಗೂ ಅನುಕೂಲವಾಗುವಂತೆ ರೂಪಿಸುವ ಯೋಜನೆ ಇದೆ.
ಮಕ್ಕಳ ಆಟದ ಮೈದಾನ, ಬಹುಪಯೋಗಿ ಕ್ರೀಡಾಂಗಣ, ಜಾಗಿಂಗ್ ಟ್ರ್ಯಾಕ್, ಆ್ಯಂಪಿಥಿಯೇಟರ್, ಹಿರಿಯ ನಾಗರಿಕರ ವಿಶ್ರಾಂತಿ ಪ್ರದೇಶ, ಅರೋಮಾ ಗಾರ್ಡನ್, ಚೆಸ್ ಹಾಗೂ ಸೆಲ್ಫಿ ಜಾಗದಂತಹ ಸೌಲಭ್ಯಗಳನ್ನು ಕಲ್ಪಿಸುವ ಉದ್ದೇಶವಿದೆ. ಇದರೊಂದಿಗೆ ಸ್ವಿಮ್ಮಿಂಗ್ ಪೂಲ್ ಮತ್ತು ಕ್ಲಬ್‌ಹೌಸ್ ನಿರ್ಮಾಣದ ಯೋಜನೆಯೂ ಇದೆ.
ಯೋಜನೆಯ ಪ್ರಮುಖ ವಿವರಗಳು –
ಬಡಾವಣೆಯ ಒಟ್ಟು ವಿಸ್ತೀರ್ಣ : 17.49 ಎಕರೆ- ಯೋಜನೆಯ ಅಂದಾಜು ವೆಚ್ಚ : 8.75 ಕೋಟಿ ರೂ.- ಒಟ್ಟು ನಿವೇಶನಗಳು : 208- ಈಗಾಗಲೇ ಹಂಚಿಕೆಯಾದ ನಿವೇಶನಗಳು : 32- ಉಳಿದಿರುವ ನಿವೇಶನಗಳು : 176- ಅರ್ಜಿ ಸಲ್ಲಿಕೆಗೆ ಕೊನೆಯ ದಿನಾಂಕ : ಡಿಸೆಂಬರ್ 28- ಅರ್ಜಿ ಸಲ್ಲಿಸುವಾಗ ಪಾವತಿಸಬೇಕಾದ ಮೊತ್ತ : ಒಟ್ಟು ನಿವೇಶನ ಮೌಲ್ಯದ ಶೇ.10.
ಈ ಯೋಜನೆಯ ಮೂಲಕ ಕುಂಜತ್ತಬೈಲ್ ಪ್ರದೇಶದಲ್ಲಿ ಸುಸಜ್ಜಿತ ಹಾಗೂ ಆಧುನಿಕ ವಸತಿ ಸಮುದಾಯ ನಿರ್ಮಾಣವಾಗುವ ನಿರೀಕ್ಷೆಯಿದೆ. ನಿವೇಶನ ಖರೀದಿಸಲು ಬಯಸುವವರು ಮುಡಾದ ಪ್ರಕಟಣೆ ಹಾಗೂ ಅರ್ಜಿ ಸಲ್ಲಿಕೆಯ ಷರತ್ತುಗಳನ್ನು ಪರಿಶೀಲಿಸಿ ಮುಂದಿನ ಕ್ರಮ ಕೈಗೊಳ್ಳಬಹುದಾಗಿದೆ.
ಕುಂಜತ್ತಬೈಲ್‌ನಲ್ಲಿ 17.49 ಎಕರೆ ಜಮೀನಿನಲ್ಲಿ ಸುಮಾರು 8.75 ಕೋಟಿ ರೂ. ವೆಚ್ಚದಲ್ಲಿ ವಸತಿ ಬಡಾವಣೆ ನಿರ್ಮಿಸಲಾಗಿದೆ. ಒಟ್ಟು 208 ನಿವೇಶನಗಳನ್ನು ಹೊಂದಿರುವ ಈ ಬಡಾವಣೆಯನ್ನು ಪ್ರೀಮಿಯಂ ನಿವೇಶನಗಳು, ವಿಶಾಲ ರಸ್ತೆಗಳು, ಹಸಿರು ಪ್ರದೇಶಗಳು ಹಾಗೂ ಅತ್ಯಾಧುನಿಕ ಸೌಲಭ್ಯಗಳೊಂದಿಗೆ ಯೋಜಿತ ವಸತಿ ಸಮುದಾಯವಾಗಿ ರೂಪಿಸಲು ಸಿದ್ಧತೆ ನಡೆಸಲಾಗಿದೆ.
ಮಾಹಿತಿ: ಸಂತೋಷ್ ಕುಮಾರ್ ಶೆಟ್ಟಿ, ಮುಡಾ ಅಧ್ಯಕ್ಷರು
