ವರದಿ /ಚಿತ್ರ :ರವಿರಾಜ್ ಕಾವೂರು
ತಿರುಪತಿ: ತಿರುಮಲ ಶ್ರೀವೆಂಕಟೇಶ್ವರ ಸ್ವಾಮಿಯ ದರ್ಶನಕ್ಕಾಗಿ ಗಂಟೆಗಟ್ಟಲೆ ಕ್ಯೂಲೈನ್‌ಗಳಲ್ಲಿ ಕಾಯುವ ಭಕ್ತಾದಿಗಳಿಗೆ ತಿರುಮಲ ತಿರುಪತಿ ದೇವಸ್ಥಾನಮ್ಸ್ (TTD) ಅತ್ಯಾಧುನಿಕ ತಂತ್ರಜ್ಞಾನದ ಮಹತ್ವದ ಕೊಡುಗೆಯೊಂದನ್ನು ನೀಡಿದೆ. ವೈಕುಂಠಂ ಕ್ಯೂ ಕಾಂಪ್ಲೆಕ್ಸ್‌ನ ಕಂಪಾರ್ಟ್‌ಮೆಂಟ್‌ಗಳಲ್ಲಿ ಕಾಯುವ ಭಕ್ತರಿಗೆ ಇನ್ಮುಂದೆ ಅತ್ಯಂತ ವೇಗವಾಗಿ ಮತ್ತು ಸ್ವಚ್ಛವಾಗಿ ಪ್ರಸಾದ ವಿತರಿಸಲು ‘ಮೂವಿಂಗ್ ಡೈನಿಂಗ್ ಫುಡ್ ಕನ್ವೇಯರ್ ಬೆಲ್ಟ್’ ಮತ್ತು ಎಕ್ಸ್‌ಎಲ್ ಲಿಫ್ಟರ್ ವ್ಯವಸ್ಥೆಯನ್ನು ಪ್ರಾಯೋಗಿಕವಾಗಿ ಜಾರಿಗೆ ತರಲಾಗಿದೆ.
ಹಬ್ಬ ಹಾಗೂ ರಜಾದಿನಗಳಲ್ಲಿ ಉಂಟಾಗುವ ಭಾರಿ ಜನದಟ್ಟಣೆಯನ್ನು ನಿಯಂತ್ರಿಸಲು ಮತ್ತು ವಿಳಂಬವಿಲ್ಲದೆ ಆಹಾರ ವಿತರಿಸಲು ಈ ಸ್ವಯಂಚಾಲಿತ ತಂತ್ರಜ್ಞಾನ ಸಹಾಯ ಮಾಡಲಿದೆ. ಕನ್ವೇಯರ್ ಬೆಲ್ಟ್ ತಂತ್ರಜ್ಞಾನದ ವಿಶೇಷತೆಗಳುಸೂಪರ್ ಫಾಸ್ಟ್ ವಿತರಣೆ: ಈ ಆಟೋಮೇಷನ್ ತಂತ್ರಜ್ಞಾನದಿಂದಾಗಿ ನಿಮಿಷಗಳಲ್ಲಿ ಸಾವಿರಾರು ಭಕ್ತರಿಗೆ ಆಹಾರ ತಲುಪಿಸಬಹುದು.
ಏನೇನು ಸಿಗಲಿದೆ?: ಬಿಸಿಬಿಸಿಯಾದ ಅನ್ನಪ್ರಸಾದ, ಉಪಹಾರ (ಉಪ್ಪಿಟ್ಟು/ಪೊಂಗಲ್), ಕಾಫಿ, ಚಹಾ, ಮಜ್ಜಿಗೆ, ಹಾಲು ಹಾಗೂ ಶುದ್ಧ ಕುಡಿಯುವ ನೀರು ನೇರವಾಗಿ ಭಕ್ತರಿದ್ದ ಜಾಗಕ್ಕೇ ಬರಲಿದೆ.ಹೈಜೀನಿಕ್ ವ್ಯವಸ್ಥೆ: ಮಾನವ ಹಸ್ತಕ್ಷೇಪ ಕಡಿಮೆ ಇರುವುದರಿಂದ ಆಹಾರ ಅತ್ಯಂತ ನೈರ್ಮಲ್ಯ ಹಾಗೂ ಬಿಸಿಯಾಗಿ ಇರಲಿದೆ.
ವೃದ್ಧರು ಹಾಗೂ ಮಕ್ಕಳಿಗೆ ಭಾರಿ ಅನುಕೂಲಸಾಮಾನ್ಯವಾಗಿ ವಾರಾಂತ್ಯ ಹಾಗೂ ಹಬ್ಬದ ದಿನಗಳಲ್ಲಿ ಭಕ್ತರು ದರ್ಶನಕ್ಕಾಗಿ 10 ರಿಂದ 24 ಗಂಟೆಗಳ ಕಾಲ ಕಾಂಪ್ಲೆಕ್ಸ್‌ಗಳಲ್ಲಿ ಕಾಯಬೇಕಾಗುತ್ತದೆ. ಈ ಸಮಯದಲ್ಲಿ ಸಣ್ಣ ಮಕ್ಕಳಿರುವ ಪೋಷಕರಿಗೆ ಹಾಗೂ ವೃದ್ಧರಿಗೆ ಸಮಯಕ್ಕೆ ಸರಿಯಾಗಿ ಆಹಾರ ಮತ್ತು ನೀರು ಸಿಗದೆ ಪರದಾಡುವ ಪರಿಸ್ಥಿತಿ ಇರುತ್ತಿತ್ತು.
ಈಗ ಜಾರಿಗೆ ತಂದಿರುವ ಕನ್ವೇಯರ್ ಬೆಲ್ಟ್ ವ್ಯವಸ್ಥೆಯಿಂದಾಗಿ ಟಿಟಿಡಿ ಸಿಬ್ಬಂದಿ ಅತಿ ಕಡಿಮೆ ಅವಧಿಯಲ್ಲಿ ಎಲ್ಲ ಕಂಪಾರ್ಟ್‌ಮೆಂಟ್‌ಗಳಿಗೂ ನಿರಂತರವಾಗಿ ಆಹಾರ ಪೂರೈಸಬಹುದಾಗಿದ್ದು, ಭಕ್ತ ವಲಯದಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.
