ವರದಿ /ಚಿತ್ರ:ಈ ಮೀಡಿಯಾ
ಉಡುಪಿ: “ಕೃತಕ ಬುದ್ಧಿಮತ್ತೆ” (Artificial Intelligence AI) ಎಂಬ ಪದವನ್ನು ಕೇಳಿದಾಗ ಹಲವರಿಗೆ ರೋಬೋಟ್ಗಳು ಅಥವಾ ವಿಜ್ಞಾನ ಕಥೆಗಳಲ್ಲಿ ಕಾಣುವ ಯಂತ್ರಗಳು ನೆನಪಾಗಬಹುದು. ಆದರೆ ನಿಜವಾಗಿ AI ಈಗಾಗಲೇ ನಮ್ಮ ಮನೆಗಳಲ್ಲೇ ಇದೆ. ನಾವು ಪ್ರತಿದಿನ ಬಳಸುವ ಅನೇಕ ಸಾಧನಗಳಲ್ಲಿ ಅದು ನಮಗೆ ತಿಳಿಯದಂತೆ ಸಹಾಯ ಮಾಡುತ್ತಿದೆ ಎಂದು ಬಂಟಕಲ್ ಶ್ರೀ ಮಧ್ಯ ವಾದಿರಾಜ ತಾಂತ್ರಿಕ ಮಹಾವಿದ್ಯಾಲಯ (SMVITM)ದ ಕಂಪ್ಯೂಟರ್ ಸೈನ್ಸ್ ಮತ್ತು ಎಂಜಿನಿಯರಿಂಗ್ ವಿಭಾಗದ (ಡಾ.) ತೇಜಸ್ವಿನಿ ಎಚ್ ರವರುತಮ್ಮ ಸಂಶೋಧನಾತ್ಮಕ ಲೇಖನದಲ್ಲಿ ಸಮರ್ಪಕ ಮಾಹಿತಿ ನೀಡಿದ್ದಾರೆ.
ಒಂದು ಮನೆಯ ಗೃಹಿಣಿಯನ್ನು ಉದಾಹರಣೆಯಾಗಿ ತೆಗೆದುಕೊಳ್ಳೋಣ. ಅವರು ಮನೆಯ ಪ್ರತಿಯೊಬ್ಬರ ಅಭ್ಯಾಸಗಳನ್ನು ತಿಳಿದುಕೊಂಡಿರುತ್ತಾರೆ. ಯಾರು ಯಾವ ಸಮಯಕ್ಕೆ ಚಹಾ ಕುಡಿಯುತ್ತಾರೆ, ಯಾರಿಗೆ ಯಾವ ಆಹಾರ ಇಷ್ಟ. ಯಾವ ದಿನ ಯಾವ ಸಾಮಾನು ಖರೀದಿಸಬೇಕು ಎಂಬುದನ್ನು ನೆನಪಿಟ್ಟುಕೊಂಡು ಕೆಲಸ ಮಾಡುತ್ತಾರೆ. ಇದೇ ರೀತಿಯಲ್ಲಿ AI ಕೂಡ ಮಾಹಿತಿಯನ್ನು ಕಲಿತುಕೊಂಡು ನಮಗೆ ಸಹಾಯ ಮಾಡುತ್ತದೆ.
ಅಡುಗೆಮನೆಯಲ್ಲಿ AI :
ಇಂದು ಅನೇಕ ಮನೆಗಳಲ್ಲಿ ಸ್ಮಾರ್ಟ್ ಮೈಕ್ರೋವೇವ್ ಗಳು ಲಭ್ಯವಿವೆ. ನಾವು ಯಾವ ಆಹಾರವನ್ನು ಬಿಸಿಮಾಡುತ್ತಿದ್ದೇವೆ ಎಂಬುದನ್ನು ಗುರುತಿಸಿ ಅದರ ಪ್ರಕಾರ ಸಮಯ ಮತ್ತು ತಾಪಮಾನವನ್ನು ಸ್ವಯಂಚಾಲಿತವಾಗಿ ಹೊಂದಿಸುತ್ತವೆ. ಕೆಲವು ಸ್ಮಾರ್ಟ್ ಫ್ರಿಜ್ಗಳು ಒಳಗಿರುವ ಆಹಾರ ಪದಾರ್ಥಗಳನ್ನು ಗಮನದಲ್ಲಿಟ್ಟುಕೊಂಡು ಹಾಲು ಮುಗಿಯುತ್ತಿದೆ”, “ಮೊಟ್ಟೆಗಳು ಕಡಿಮೆಯಾಗಿವೆ” ಎಂಬ ನೆನಪುಗಳನ್ನು ನೀಡುತ್ತವೆ. ಭವಿಷ್ಯದಲ್ಲಿ ಇವು ಸ್ವತಃ ಆನ್ಲೈನಿನಲ್ಲಿ ಆರ್ಡರ್ ಕೂಡ ಮಾಡಬಹುದು. ಮೊಬೈಲ್ನಲ್ಲಿ ಅಡುಗೆ ವಿಡಿಯೋಗಳನ್ನು ನೋಡಿದಾಗ ನೀವು ಹೆಚ್ಚಾಗಿ ದೋಸೆ, ಇಡ್ಲಿ ಅಥವಾ ಸಿಹಿ ತಿಂಡಿಗಳ ವಿಡಿಯೋಗಳನ್ನು ನೋಡುತ್ತಿದ್ದರೆ, ಅದೇ ರೀತಿಯ ಇನ್ನಷ್ಟು ಅಡುಗೆ ವಿಧಾನಗಳನ್ನು ಯೂಟ್ಯೂಬ್ ಶಿಫಾರಸು ಮಾಡುತ್ತದೆ. ಇದರ ಹಿಂದೆ AI ಕೆಲಸ ಮಾಡುತ್ತಿದೆ.
ಬಟ್ಟೆ ತೊಳೆಯುವ ಯಂತ್ರದಲ್ಲಿ AI :
ಹಳೆಯ ವಾಷಿಂಗ್ ಮಷಿನ್ ಗಳಲ್ಲಿ ಎಲ್ಲಾ ಬಟ್ಟೆಗಳಿಗೂ ಒಂದೇ ರೀತಿಯ ಪ್ರೋಗ್ರಾಂ ಬಳಸಬೇಕಾಗುತ್ತಿತ್ತು. ಆದರೆ ಇಂದಿನ ಕೆಲವು ಯಂತ್ರಗಳು ಬಟ್ಟೆಗಳ ತೂಕವನ್ನು ಗುರುತಿಸಿ ಎಷ್ಟು ನೀರು ಬೇಕು, ಎಷ್ಟು ಸಮಯ ತೊಳೆಯಬೇಕು ಎಂಬುದನ್ನು ತಾವೇ ನಿರ್ಧರಿಸುತ್ತವೆ. ಉದಾಹರಣೆಗೆ, ಕೇವಲ ಎರಡು ಶರ್ಟ್ ಗಳಿದ್ದರೆ ಕಡಿಮೆ ನೀರು ಬಳಸುತ್ತವೆ. ಹಾಸಿಗೆ ಚಾದರಗಳು ಅಥವಾ ಹೆಚ್ಚು ಬಟ್ಟೆಗಳಿದ್ದರೆ ತೊಳೆಯುವ ವಿಧಾನವನ್ನು ಬದಲಾಯಿಸುತ್ತವೆ. ಇದರಿಂದ ನೀರು ಮತ್ತು ವಿದ್ಯುತ್ ಉಳಿತಾಯವಾಗುತ್ತದೆ.
ಮನೆಯ ಸ್ವಚ್ಛತೆಯಲ್ಲಿ AI :
ಇಂದು ಮಾರುಕಟ್ಟೆಯಲ್ಲಿ ಲಭ್ಯವಿರುವ ರೋಬೋಟ್ ವ್ಯಾಕ್ಯೂಮ್ ಕ್ಲೀನರ್ಗಳು ಮನೆಯ ನಕ್ಷೆಯನ್ನು ನೆನಪಿಟ್ಟುಕೊಳ್ಳುತ್ತವೆ. ಸೋಫಾ, ಟೇಬಲ್ ಅಥವಾ ಕುರ್ಚಿಗಳಂತಹ ಅಡೆತಡೆಗಳನ್ನು ಗುರುತಿಸಿ ಅವುಗಳಿಗೆ ಡಿಕ್ಕಿ ಹೊಡೆಯದೇ ಸ್ವಚ್ಛಗೊಳಿಸುತ್ತವೆ. ಮನೆಗೆ ಅತಿಥಿಗಳು ಬಂದ ನಂತರ ಹೆಚ್ಚು ಕಸವಾಗಿರುವ ಪ್ರದೇಶಗಳನ್ನು ಮತ್ತೆ ಸ್ವಚ್ಛಗೊಳಿಸುವ ಸಾಮರ್ಥ್ಯವೂ ಕೆಲವು ಸಾಧನಗಳಿಗೆ ಇದೆ.
ದೂರದರ್ಶನ ಮತ್ತು ಮನರಂಜನೆಯಲ್ಲಿ AI :
ಒಂದು ಕುಟುಂಬದಲ್ಲಿ ಮಕ್ಕಳು ಕಾರ್ಟೂನ್ಗಳನ್ನು ನೋಡುತ್ತಾರೆ. ಪೋಷಕರು ಸುದ್ದಿಗಳನ್ನು ನೋಡುತ್ತಾರೆ ಎಂದು ಕಲ್ಪಿಸಿಕೊಳ್ಳಿ. ಸ್ಮಾರ್ಟ್ ಟಿವಿ ಈ ಅಭ್ಯಾಸಗಳನ್ನು ಗಮನಿಸಿ ಮಕ್ಕಳಿಗೆ ಕಾರ್ಟೂನ್ಗಳನ್ನು ಮತ್ತು ಹಿರಿಯರಿಗೆ ಸುದ್ದಿ ಅಥವಾ ಚಲನಚಿತ್ರಗಳನ್ನು ಶಿಫಾರಸು ಮಾಡುತ್ತದೆ. ನಾವು ಯಾವ ರೀತಿಯ ಹಾಡುಗಳನ್ನು ಹೆಚ್ಚಾಗಿ ಕೇಳುತ್ತೇವೋ ಅದರ ಆಧಾರದ ಮೇಲೆ ಸಂಗೀತ ಆ್ಯಪ್ಗಳು ಹೊಸ ಹಾಡುಗಳನ್ನು ಸೂಚಿಸುತ್ತವೆ. ಹೀಗಾಗಿ ನಮಗೆ ಬೇಕಾದ ವಿಷಯಗಳನ್ನು ಹುಡುಕುವ ಸಮಯ ಕಡಿಮೆಯಾಗುತ್ತದೆ.
ಮೊಬೈಲ್ ಫೋನ್ನಲ್ಲಿ AI :
ನಾವು “ನಮಸ್ಕಾರ” ಎಂದು ಟೈಪ್ ಮಾಡಿದಾಗ ಮುಂದಿನ ಪದವನ್ನು ಮೊಬೈಲ್ ಊಹಿಸಿ ತೋರಿಸುತ್ತದೆ. ಫೋಟೋ ತೆಗೆದಾಗ ಮುಖವನ್ನು ಗುರುತಿಸಿ ಚಿತ್ರವನ್ನು ಇನ್ನಷ್ಟು ಸುಂದರವಾಗಿ ಮಾಡುತ್ತದೆ. ಕೆಲವೊಮ್ಮೆ ನಾವು “ಅಮ್ಮ” ಎಂದು ಹುಡುಕಿದರೆ, ಫೋನನಲ್ಲಿರುವ ಅಮ್ಮನ ಎಲ್ಲಾ ಫೋಟೋಗಳನ್ನು ತೋರಿಸುತ್ತದೆ. ಇದು AI ಮುಖಗಳನ್ನು ಗುರುತಿಸುವ ಸಾಮರ್ಥ್ಯದ ಉದಾಹರಣೆ. ಮನೆಯ ಸುರಕ್ಷತೆಯಲ್ಲಿ AI ಇಂದಿನ ಕೆಲವು ಸಿಸಿಟಿವಿ ಕ್ಯಾಮೆರಾಗಳು ಸಾಮಾನ್ಯ ಚಲನೆ ಮತ್ತು ಅನುಮಾನಾಸ್ಪದ ಚಲನೆಯ ನಡುವಿನ ವ್ಯತ್ಯಾಸವನ್ನು ಗುರುತಿಸಬಲ್ಲವು. ಮನೆಯ ಸದಸ್ಯರು ಬಂದಾಗ ಒಂದು ರೀತಿಯಲ್ಲಿ ಪ್ರತಿಕ್ರಿಯಿಸಿದರೆ, ಅಪರಿಚಿತ ವ್ಯಕ್ತಿ ಬಂದಾಗ ಮೊಬೈಲ್ ಗೆ ಎಚ್ಚರಿಕೆ ಸಂದೇಶ ಕಳುಹಿಸುತ್ತವೆ.
AI-ಸಹಾಯಕ, ಪರ್ಯಾಯವಲ್ಲ” :
AI ನಮ್ಮ ಕೆಲಸಗಳನ್ನು ಸುಲಭಗೊಳಿಸಬಹುದು. ಆದರೆ ಅದು ಮನುಷ್ಯರನ್ನು ಸಂಪೂರ್ಣವಾಗಿ ಬದಲಾಯಿಸಲು ಸಾಧ್ಯವಿಲ್ಲ. ಮನೆಯ ಹಿರಿಯರು ನೀಡುವ ಅನುಭವ, ತಾಯಿಯ ಕಾಳಜಿ ಅಥವಾ ಶಿಕ್ಷಕರ ಮಾರ್ಗದರ್ಶನವನ್ನು ಯಾವುದೇ ಯಂತ್ರ ಸಂಪೂರ್ಣವಾಗಿ ನೀಡಲು ಸಾಧ್ಯವಿಲ್ಲ. ಆದ್ದರಿಂದ AI ಬಗ್ಗೆ ಭಯಪಡುವ ಅಗತ್ಯವಿಲ್ಲ. ಅದು ನಮ್ಮ ದಿನನಿತ್ಯದ ಕೆಲಸಗಳನ್ನು ಸುಲಭಗೊಳಿಸುವ ಹೊಸ ಸಹಾಯಕ ಎಂದು ಅರ್ಥಮಾಡಿಕೊಳ್ಳಬೇಕು.
ಸರಿಯಾದ ರೀತಿಯಲ್ಲಿ ಬಳಸಿದರೆ, AI ನಮ್ಮ ಸಮಯವನ್ನು ಉಳಿಸಿ, ಜೀವನವನ್ನು ಇನ್ನಷ್ಟು ಸುಲಭ ಮತ್ತು ಪರಿಣಾಮಕಾರಿಯಾಗಿಸಬಹುದು. ಇಂದು ಮನೆಯ ಅಡುಗೆಮನೆಯಿಂದ ಹಿಡಿದು ಮೊಬೈಲ್ ಫೋನಿನವರೆಗೆ AI ನಮ್ಮೊಂದಿಗಿದೆ. ಭವಿಷ್ಯದಲ್ಲಿ ಅದು ಇನ್ನಷ್ಟು ಬುದ್ಧಿವಂತ ಸಹಾಯಕನಾಗಿ ನಮ್ಮ ಜೀವನದ ಭಾಗವಾಗಲಿದೆ ಎಂದು ಹೇಳುತ್ತಾರೆ (ಡಾ.) ತೇಜಸ್ವಿನಿ ಎಚ್.
